Ҫӗмӗрле районӗнчи Хутар ялӗнче пурӑнакан 36 ҫулти арҫын тӗлӗшпе пуҫиле ӗҫ пуҫарнӑ. Вӑл ҫынна вӗлернӗ тесе шутлаҫҫӗ.
Следстви версийӗ тӑрӑх, ака уйӑхӗн 29-мӗшӗнче ҫак арҫын килӗнче 68 ҫулти тӑванӗпе хирӗҫсе кайнӑ. Кӗҫӗнни аслине пуҫӗнчен тимӗр пепельницӑпа 4 хутран кая мар ҫапнӑ. Лешӗ ҫавӑнтах вилнӗ.
36-ри арҫынна тытса чарнӑ. Ӑна следстви вӑхӑтӗнче хупса усрас ыйтӑва пӑхса тухаҫҫӗ. Пуҫиле ӗҫе малалла тӗпчеҫҫӗ.
Тӑвай районӗнче пурӑнакан арҫын килте патронсем упранине тупса палӑртнӑ. РФ Следстви комитечӗн Чӑваш Енри следстви органӗсем ун тӗлӗшпе пуҫиле ӗҫ пуҫарнӑ.
Следстви версийӗ тӑрӑх, 2016 ҫулхи ҫулла 50 ҫулти арҫынна пӗлӗшӗнчен 1732 патрон еткерлӗхе лекнӗ. Вӗсем спорт тата сунар пӑшалӗ валли. Экспертиза палӑртнӑ тӑрӑх, патронсен пӗр пайӗ пеме юрӑхлӑ.
Арҫын тӗлӗшпе пуҫарнӑ пуҫиле ӗҫе малалла тӗпчеҫҫӗ. Тӗрлӗ экспертиза ирттерӗҫ, кӳнтеленсенчен ыйтса пӗлӗҫ.
Канаш районӗнчи Анаткас Кипеч ялӗнче пурӑнакан арҫын ентешӗсем унпа пӗрле эрех ӗҫменшӗн хирӗҫме тытӑннӑ. Хайхискер ҫынна та вӗлернӗ.
Следстви версийӗ тӑрӑх, ака уйӑхӗн 14-мӗшӗнче вӑл каҫхи 10 сехетре пӗр хӗрарӑм патне пынӑ. Лешӗн патӗнче тепӗр хӗрарӑм тата икӗ арҫын пулнӑ.
Хайхи хӑна вӗсене эрех ӗҫме сӗннӗ, анчах лешсем хирӗҫленӗ. Ку тарӑхса кайнӑ, пӗр арҫынна вилмеллех хӗненӗ, теприне ҫӗҫӗпе 5 хутчен чикнӗ. Юрать, ӑна чарнӑ. Хӗрӑмсем полици, васкавлӑ медпулӑшу чӗннӗ. Тухтӑрсем пулӑшнипе суранланнӑ арҫын чӗрӗ юлнӑ.
Хӑнана пынӑ арҫынна тытса чарнӑ, ун тӗлӗшпе пуҫиле ӗҫ пуҫарнӑ.
Паян 15 сехет те 45 минутра Ҫӗнӗ Шупашкарти Собор лапамӗнчи общество транспорчӗн чарӑнӑвӗнче ҫын виллине тупнӑ. Кун пирки "Про Город" хаҫата халӑх корреспонденчӗ пӗлтернӗ.
Ҫакӑ паллӑ: арҫынна пумсӑрласа вӗлернӗ йӗр ҫук. Вӑл 1951 ҫулта ҫуралнӑскер пулнӑ.
РФ Следстви комитечӗн Чӑваш Енри следстви органӗсем кун тӗлӗшпе следстви умӗнхи тӗрӗслев ирттереҫҫӗ
Пӗлтӗр раштав уйӑхӗн 23-мӗшӗнче Хӗрлӗ Чутайра 75 ҫулти арҫынна вӗлернӗ. Следстви комитечӗ кун тӗлӗшпе пуҫиле ӗҫ пуҫарнӑ. Ҫак тискер ӗҫе унтах пурӑнакан 68 ҫулти арҫын тунӑ тесе шутлаҫҫӗ.
Следстви версийӗ тӑрӑх, ҫав кун 75-ри арҫын тӑванне вӑратнӑ. Лешне, мухмӑрласкере, ку килӗшмен, харкашма пуҫланӑ. Хайхискер ватӑ ҫынна нумай хутчен ҫапнӑ. Лешӗ вилмеллех суранланнӑ.
Следовательсем палӑртнӑ тӑрӑх, ҫак арҫын преступлени вӑхӑтӗнче психика чирӗпе аптӑранӑ. Суд ӑна ятарлӑ учреждение сипленмешкӗн яма пултарӗ.
14 ҫулти хӗрача пуҫа минретекен япала ӑша ярса вилнӗ. Следстви комитечӗ кун тӗлӗшпе пуҫиле ӗҫ пуҫарнӑ.
Следстви версийӗ тӑрӑх, нарӑс уйӑхӗн 13-мӗшӗнче ҫӗрле Ҫӗнӗ Шупашкарта пурӑнакан хӗрача минрес тесе пуҫне хутаҫ тӑхӑннӑ, аэрозоль дезодорантне сывланӑ. Вӑл сывлӑш ҫитменнипе вилнӗ.
Следстви шутланӑ тӑрӑх, хӗрача халӑх тетелӗнче ҫапла майпа голлюцинаци, эйфори тумалли мелсене кӑтартакан контента пӑхнӑ. Прокуратурӑна ку контента блокировка тума ыйтнӑ.
Ҫакӑ паллӑ: хӗрача чылай вӑхӑт пӗччен пурӑннӑ. Унӑн ашшӗ-амӑшне явап тыттарасси пирки шутлаҫҫӗ.
Пуш уйӑхӗн 3-мӗшӗнче Шупашкарти ҫурҫӗр-хӗвеланӑҫ районӗнче нумай хутлӑ ҫурт ҫывӑхӗнче арҫын виллине тупнӑ Кун пирки "Про Город" хаҫата халӑх корреспонденчӗ Юрий Шакеев пӗлтернӗ.
Арҫын виллине 15 сехет ҫурӑра асӑрханӑ. Вӑл Гузовский урамӗнчи 14-мӗш ҫуртри тӑваттӑмӗш хутри балкон ҫинчен ӳкнӗ. Вырӑна полици ӗҫченӗсем, васкавлӑ медпулӑшу бригади ҫитнӗ.
Мӗн пулнӑ-ха? Следстви комитечӗ халӗ ӗҫ-пуҫа уҫӑмлатать.
Хӗрлӗ Чутай районӗнче пурӑнакан 65 ҫулти хӗрарӑм тӗлӗшпе Следстви комитечӗ пуҫиле ӗҫ пуҫарнӑ. Вӑл ҫыннӑн сывлӑхне асӑрханмасӑр сиенлетсе ӑна вӗлернӗ тесе шутлаҫҫӗ.
Следстви версийӗ тӑрӑх, нарӑс уйӑхӗн 10-мӗшӗнче 21 сехетре ҫак ӳсӗр хӗрарӑм пӗрле пурӑнакан 61 ҫулти арҫынпа хирӗҫсе кайнӑ та ӑна ҫӗҫӗпе темиҫе хутчен чикнӗ.
Арҫынна пульницӑна илсе ҫитернӗ. Вӑл реанимацире 12 кун пурнӑҫпа вилӗм хушшинче выртнӑ. Шел те, нарӑсӑн 22-мӗшӗнче унӑн чӗри тапма пӑрахнӑ.
Хӗрарӑма тытса чарнӑ. Пуҫиле ӗҫе тишкернӗ чухне вӑл решетке хыҫӗнче пулӗ.
Шупашкарта рабочи ҫӳллӗшӗнчен ӳкнӗ. Шел те, унӑн пурнӑҫне тухтӑрсем те ҫӑлса хӑварайман.
Кун тӗлӗшпе пуҫиле ӗҫ пуҫарнӑ. Инкек «Феникс» пурӑнмалли комплексра пулнӑ. Следстви комитечӗн следователӗсен версийӗ тӑрӑх, пӗлтӗрхи раштав уйӑхӗн 28-мӗшӗнче 25 ҫулти строитель 10-мӗш хутра ӗҫленӗ чухне таянса кайнӑ та 8-мӗш хута персе аннӑ. Унӑн пуҫӗ, мӑйӗ, кӗлетки, алли-ури аманнӑ. Вӑл пульницӑра кӑрлач уйӑхӗн 1-мӗшӗнче вилнӗ.
Следовательсем шутланӑ тӑрӑх, инкек страховка тросӗсем ҫуккипе пулнӑ. Ҫавӑн пекех ӗҫ хӑрушсӑрлӑхӗн нормисене пӑснӑ тесе шутлаҫҫӗ.
Канаш хулинче пурӑнакан 51 ҫулти арҫын тӗлӗшпе Следстви комитечӗ пуҫиле ӗҫ пуҫарнӑ. Вӑл пиччӗшне вӗлернӗ тесе шутлаҫҫӗ.
Инкек ҫак кунсенче, нарӑс уйӑхӗн 12-мӗшӗнче, пулнӑ. Следстви версийӗ тӑрӑх, ҫав кун ҫур ҫӗр иртсен вӑл 59 ҫулти пиччӗшне ҫурӑмӗнчен ҫӗҫӗпе виҫӗ хутчен чикнӗ. Ҫав самантра амӑшӗ те килтех пулнӑ. Вӑл аслӑ ывӑлне хӳтӗлеме тӑнӑ. Анчах арҫын 84 ҫулти амӑшне те хӗрхенмен – хӗнесе пӗтернӗ: аяк пӗрчисене хуҫнӑ, пуҫне суранлатнӑ. Ватӑ хӗрарӑма пульницӑна илсе ҫитернӗ.
Пиччӗшне вара ҫӑлма май килсен – вӑл ҫавӑнах вилнӗ. Шӑллӗне тытса чарнӑ. Халӗ пуҫиле ӗҫе малалла тӗпчеҫҫӗ.
+20.3 °C